Сімвалічны пашпарт Беларусі ўручыла Прэзідэнту студэнтка Акадэміі кіравання

Сімвалічны пашпарт Беларусі Аляксандру Лукашэнку ўручыла студэнтка 1-га курса Акадэміі Кіравання пры Прэзідэнце Рэспублікі Беларусь Алена Сарока ў час 41-га з'езда грамадскага аб'яднання «Беларускі рэспубліканскі саюз моладзі».

Алена Сарока падзякавала Кіраўніку дзяржавы за ўвагу да моладзі і адзначыла, што сучасныя маладыя людзі павінны зрабіць усё, што ад іх залежыць, для працвітання Радзімы. «Нашы патрыятычныя пачуцці пастаянна прыціскаюць, нам навязваюць чужыя жыццёвыя стандарты, ставячы ў аснову інтарэсы чалавека-спажыўца, які за грошы, добрае адзенне, модны тэлефон або проста ад бяздзейнасці і пустой цікавасці зможа, напрыклад, чарговы раз выйсці на плошчу папляскаць, пабіць шыбы», – сказала яна. Маладыя людзі павінны больш думаць аб тым, як захаваць павагу да слаўнай гісторыі, традыцый, культурнай спадчыны. «Кожны з нас можа праявіць сваю актыўную пазіцыю ў канкрэтных справах, удзелам у праграмах і яркіх праектах БРСМ», – адзначыла студэнтка Акадэміі кіравання.

У многіх юнакоў і дзяўчат ёсць імкненне ўдзельнічаць у грамадска-палітычным жыцці, і Саюз моладзі – гэта выдатная пляцоўка для фарміравання прафесійных якасцей грамадскага кіраўніка, лічыць Алена Сарока. «Вучыцца добра, працаваць якасна, быць актыўным грамадзянінам – усе гэтыя дзеянні мы кожны дзень ажыццяўляем на карысць сваёй Радзімы – Рэспублікі Беларусь!» – рэзюмавала дэлегат з'езда.

Стварэнне буклета «Пашпарт маёй краіны» Беларускі рэспубліканскі саюз моладзі ініцыіраваў у 2010 годзе. Гэта сімвал акцыі «Мы – грамадзяне Беларусі!». Знешне ён нагадвае пашпарт, у ім столькі ж старонак – 32. На першай старонцы размешчаны зварот з заклікам быць актыўным, смела ісці да намечанай мэты і весці за сабой іншых. У буклеце шмат карыснай інфармацыі.

© Па матэрыялах БЕЛТА